Gipasaligan ni Mayor Nestor Archival ang katawhan nga full alert gihapon ang Cebu City Government samtang nagpadayon ang ulan nga dala sa shearline weather system, nga hinungdan sa pipila ka minor nga baha ug landslide sa mga bukiran nga barangay sa siyudad.
Sumala sa mayor, base sa assessment, walay natala nga dakong landslide. Apan adunay pipila ka localized nga insidente sa mga barangay sa Budlaan, Mabini, Pulang Dako, ug Dako. Sa Barangay Pulang Dako, adunay mga kahoy nga natumba nga nakaapekto sa pipila ka balay, hinungdan nga dali nga miresponde ang mga disaster team sa siyudad.
Gitabangan dayon ang mga apektadong residente ug ang uban gibalhin sa evacuation areas isip paglikay sa peligro. Gipadala usab ang disaster response units aron maghimo og clearing operations, pumping activities, ug damage assessment. Sa Barangay Mabini, gipadala ang heavy equipment human makita ang paglihok sa yuta sa pipila ka bahin.
Gipahinumdoman ni Mayor Archival ang mga opisyal sa barangay nga sundon gyud ang standard operating procedures, lakip na ang preemptive evacuation sa mga lugar nga delikado sa baha ug landslide kon dili na luwas ang kahimtangan.
Matod pa sa mayor, andam ang city government nga mohatag og dugang nga mga pump, ekipo, pagkaon, ug uban pang logistics kon gikinahanglan. Bahin sa flood mitigation, giingon niya nga apil na sa programa sa gobyerno ang gabion dam projects, ug importante gyud ang hustong technical study aron mahibal-an ang angay nga lokasyon niini.
Padayon ang pagbantay sa kahimtang sa panahon ug ang city government nag-awhag sa publiko nga magmatngon ug mosunod sa mga pahimangno sa lokal nga otoridad.
Source: Cebu City PIO
I via Renante Socia Lada