Napulo ug pito (17) ka pasyente ang malampusong naoperahan sa unang adlaw sa West Coast Surgical Mission nga gihimo sa Cebu Provincial Hospital–Carcar (CPH-Carcar) niadtong Pebrero 9, sumala sa update ni Dr. Nikki Catalan.
Matod ni Dr. Catalan, Piso Public Health Consultant sa Kapitolyo, lain-laing klase sa operasyon ang gihimo aron matabangan ang mga pasyente. Lakip niini ang lima ka kaso sa gynecology, upat ka operasyon sa thyroid, duha ka hernia, duha ka hemorrhoids, duha ka cyst removal, usa ka fistula surgery, ug usa ka operasyon sa tonsils.
Gawas sa mga operasyon, kapin sa 130 ka tawo usab ang nakapahimulos sa HIV testing pinaagi sa Vicente Sotto Memorial Medical Center (VSMMC) Kaambag Clinic isip bahin sa preventive healthcare services sa maong misyon.
Bisan pa sa kakapoy tungod sa taas nga oras sa operasyon, nalipay ang visiting surgical team sa pagtilaw sa lokal nga banana cue, nga mainiton nilang gidawat.
Ang surgical mission magpadayon sulod sa upat ka adlaw o hangtod Pebrero 12, ug nahimong posible pinaagi sa panagtambayayong sa VSMMC, West Coast Surgical Mission Society, ug Healthway Cebu Velez General Hospital.
Gipasalamatan ni Dr. Catalan ang tanang doktor, nurse, ug support staff sa ilang walay kakapoy nga serbisyo ug dedikasyon sa pag-atiman sa mga pasyente.
Source: Cebu Province PIO
I via Renante Socia Lada