Gihangyo ni Cebu City Mayor Nestor Archival ang mga tag-iya sa dagkong establisemento sa siyudad nga sila mismo ang manguna sa pagdumala sa ilang basura, samtang nagpadayon ang hagit sa waste management sa Cebu City.
Gipadayag kini sa mayor atol sa press conference nga gihimo sa Cebu City Hall niadtong Martes, Pebrero 10, 2026. Matod pa niya, adunay miting nga ipahigayon uban sa mga representante sa dagkong establisemento karong Miyerkules, Pebrero 11.
Sumala ni Mayor Archival, iyang hangyoon ang mga establisemento nga palig-onon ang waste segregation, ug gikan karon hangtod Marso, sila una ang motagad ug modumala sa ilang basura. Giingon niya nga usahay dili maigo ang usa ka truck sa kadaghan sa basura sa mga dagkong establisemento.
Gidugang sa mayor nga adunay mga kahinguhaan ang dagkong establisemento ug mas kaya nila nga motagad sa ilang basura sa dili pa kini kuhaon sa siyudad.
Iyang giingon usab nga makigkoordinar siya sa mga waste collectors sa maong establisemento aron masiguro nga sakto ug husto ang paglabay sa basura.
Giklaro niya nga dili angay ilabay ang basura bisag asa sama sa kilid sa sapa kay makadugang kini sa problema sa baha ug kahugaw sa palibot.
Sa karon, padayon pa ang paningkamot sa city government sa pagpangita og solusyon sa waste management, ilabi na nga wala pa gihapon permanenteng disposal site ang Cebu City human sa insidente sa Binaliw landfill.
Source: Cebu City PIO
I via Renante Socia Lada