Hapit ₱700 milyon nga kantidad sa nakompiskar nga ilegal nga drogas ang permanenteng gibungkagsa usa ka drug destruction activity nga gihimo sa Cosmopolitan Funeral Homes sa Junquera Street, Cebu City kagahapon Hulyo 28, 2026.
Ang kalihokan gipangulohan ni PDEA Director General Undersecretary Isagani R. Nerez uban ni Cebu City Councilor Paul Labra II. Mitambong usab ang mga opisyal sa Police Regional Office 7 (PRO7), lokal nga panggamhanan, ug ubang ahensya sa gobyerno.
Gisunog sa maong kalihokan ang 99.45 ka kilo nga shabu nga nagkantidad og ₱676.2 milyon, kapin 2.5 ka kilo nga marijuana nga balor og ₱304,749, ug uban pang ilegal nga drogas nga nakuha sa mga operasyon gikan pa sa 1999 hangtod 2026. Ang mga drogas gisunog pinaagi sa thermal destruction, usa ka pamaagi nga makaguba sa kemikal nga komposisyon niini aron dili na kini magamit pag-usab.
Atol usab sa programa, gipasidunggan sa PDEA ang upat ka confidential informants ubos sa Operation: Private Eye, diin nakadawat sila og kapin ₱700,000 nga ganti tungod sa ilang impormasyon nga nakatabang sa malampusong anti-illegal drug operations.
Sumala ni PRO7 Regional Director PBGEN Arnold E. Abad, sama kaimportante ang pagsunog sa mga nakompiskar nga drogas sama sa ilang pagkakompiskar aron masiguro nga dili na kini makabalik sa kadalanan ug makadaot sa mga komunidad.
Gipasiugda usab niya nga magpadayon ang PRO7 sa hugot nga kampanya batok sa ilegal nga drogas aron mapanalipdan ang katawhan sa Central Visayas.
I via Renante Socia Lada