Nagmalampuson ang gipahigayon nga Cebu People’s Indignation Rally kagabii, Pebrero 22, 2025. Gitambungan kini sa liboan ka mga supporters nga mipakita sa ilang suporta kang VP Sara Duterte sa taliwala sa nagpadayong impeachment proceedings batok kaniya.
Ang maong rally, nga gipahigayon sa Dakbayan sa Mandaue, usa ka dakong demonstrasyon sa pagsupak sa gipaabot nga impeachment case kang VP Duterte.
Si kanhi Presidente Rodrigo Duterte, mga kandidato sa PDP-Laban ang nanguna sa maong kalihokan.
Diin, matod ni kanhi Presidente Duterte nga ang impeachment usa ka pulitikal nga lihok nga nagtinguha sa pagpukan sa iyang anak sa pwesto.
Mga kandidato sa PDP-Laban, nagpadayag sa ilang hugot nga suporta kang VP Duterte ug sa ilang pangandam alang sa umaabot nga eleksyon 2025.
Ang maong pagtapok gibanabana nga may liboan ka mga partisipante, nagdala og mga placard ug banner nga nagpadayag sa ilang pagsupak sa impeachment. Kini nagpakita nga duna gihapon lig-on nga suporta kang VP Duterte ug sa ilang partido sa Central Visayas.
Samtang gihulat ang impeachment proceedings ang katawhan nagpaabot usabkung unsay sunod nga lihok sa administrasyon ug sa oposisyon.
Nasayran usab nga ang mga lokal nga aspirant nga misuporta sa PDP Laban ug buot magpapili sa midterm elections mitambong sa maong rally. (Renante Socia Lada)