Sugdan na sunod semana ang pagbaligya og bugas nga tag-P20 kada kilo sa mga probinsya sa Visayas, sumala sa gi anunsyo sa Department of Agriculture (DA) atol sa tigum uban ni Presidente Ferdinand Marcos Jr. ug mga gobernador sa Visayas nga gipahigayon sa Cebu Provincial Capitol kagahapong adlawa Abril 23, 2025.
Matod ni Agriculture Secretary Francisco Tiu Laurel Jr., gipili ang mga probinsya sa Visayas isip unang lugar sa pilot rollout sa maong programa. Giubanan si Presidente Marcos Jr. sa Special Assistant to the President nga si Sec. Antonio Lagdameo Jr. sa maong kalihukan.
Gisugat sila ni Cebu Gob. Gwen Garcia ug uban pang mga gobernador sa Visayas sama nila Gob. JC Rahman Nava (Guimaras), Gob. Jose Enrique Miraflores (Aklan), Gob. Edwin Ongchuan (Northern Samar), Gob. Jericho Petilla (Leyte), Gob. Manuel Sagarbarria (Negros Oriental), Gob. Jake Vincent Villa (Siquijor), Gob. Ben Evardone (Eastern Samar), Gob. Damian Mercado (Southern Leyte), Gob. Gerard Roger Espina (Biliran), Gob. Arthur Defensor Jr. (Iloilo), ug Board Member Fe Tan Arcales sa Samar.
Gipadayag ni Sec. Laurel nga hugot ang pakigtambayayong sa national government ug mga LGU aron mapatuman ang programa, nga padayong suportahan hangtod tuig 2028.
Ang Sugbo Merkadong Barato (SMB) nga gilusad ni Gob. Gwen Garcia niadtong Nobyembre 2023 ang unang programa sa lokal nga gobyerno nga misuporta sa kampanya ni Marcos nga pagpaubos sa presyo sa bugas. Ang SMB nagtugot sa mga lungsod ug syudad nga mabaligya og bugas nga P20/kilo alang sa mga kabus nga pamilya sa ilang tagsa-tagsa ka lugar.
Source: Cebu Provincial Capitol, PIO
I via Renante Socia Lada