Mohimo og hingpit nga imbestigasyon ang Department of Environment and Natural Resources (DENR) kabahin sa Monterrazas de Cebu Project human sa mga reklamo sa mga residente bahin sa pagbaha ug posibleng kahuyang sa mga bakilid sa kasikbit nga lugar.
Sa opisyal nga pahibalo, gipahibalo sa DENR-7 nga nagsugod sila og usa ka multi-agency Joint Inspection, Investigation, and Assessment Team aron maghimo og komprehensibo nga on-site review sa proyekto sugod Nobyembre 7, 2025.
Ang maong grupo mosusi sa pagsunod sa Environmental Compliance Certificate (ECC) sa proyekto ug sa mga lagda sa kalikupan, lakip na ang drainage system, slope protection, ug runoff control nga maoy hinungdan sa kabalaka sa mga residente.
Magpunting usab ang imbestigasyon sa kalig-on sa bukid, posibilidad sa pagdahili sa yuta, peligro sa baha, ug bisan unsang mga pagbag-o sa natural nga porma sa yuta o sa mga kasikbit nga timberland areas. Gipahimangnoan usab sa DENR ang proponent sa proyekto nga isumite ang ilang Engineering, Geological, and Geohazard Assessment (EGGA) aron ma-validate sa inspection team.
Gipasalig sa ahensya nga ipahibalo sa publiko ang mga resulta samtang nagpadayon ang imbestigasyon, taliwala sa panawagan sa mga residente ug lokal nga opisyal nga patubagon ang mga responsable sa mga pagbaha nga miigo sa Barangay Guadalupe.
Source: DENR-7
I via Renante Socia Lada