Gidayeg ug giila ni Cebu Gov. Pamela Baricuatro si Francis Anthony Narvasa, ang wing van driver nga giisip nga bayani tungod sa iyang maisugong pagbuhat sa panahon sa grabe nga pagbaha sa Barangay Cotcot, Liloan atol sa pag-igo ni Bagyong Tino.
Nakita sa usa ka nag-viral nga video ang higayon nga si Narvasa, uban ang duha niya ka kauban, gigamit ang wing van sa ilang kompanya aron babagan ang kusog nga baha, hinungdan nga naluwas ang unom ka tawo nga halos madalasa sa tubig.
Panahon sa ilang panagtagbo sa Capitol, gisulti ni Narvasa kang Gov. Baricuatro nga natangtang siya sa trabaho human gamita ang sakyanan sa kompanya alang sa maong rescue.
Tungod sa iyang kaisog ug pagpakabana, gihimo ni Gov. Baricuatro ang paghatag kaniya og trabaho isip driver sa Kapitolyo.
“Dako nakong pasalamat ni Governor Baricuatro sa higayon nga iyang gihatag ug sa tabang ning panahona nga lisod para nako,” matod ni Narvasa.
Source: Cebu Province PIO
I via Renante Socia Lada