Usa ka makasubo nga panghitabo ang mihapak sa pamilya Decalan sa Barangay Camugao, Pinamungajan, Sugbo, human makit-i ang ilang paryente nga si Joseph Calipay Decalan nga patay na ug hapit na madugta sa sapa sa ilang lugar, niadtong Hulyo 4, 2025.
Si Decalan, 33 anyos, ulitawo, ug residente sa Purok Pinya, gi-report nga missing sukad pa sa Hunyo 24. Sumala sa iyang inahan nga si Remedios Decalan, dugay na kining nag-antos sa problema sa pangisip ug usahay mokalit lang og lakaw nga walay pahibalo.
Ang patay’ng lawas unang nakita ni Esteban Buenaflor Canumay, usa ka mag-uuma nga namasol sa sapa duol sa Purok Nangka. Matud niya, nanimaho na kini ug naglutaw-lutaw sa tubig. Human sa iyang nadiskubrehan, dali siyang mipahibalo sa mga opisyal sa barangay ug kapulisan.
Sa inisyal nga imbestigasyon sa mga otoridad, wala silay nakitang senyales sa panamastamas o foul play sa lawas sa biktima. Posibleng natural ang hinungdan sa iyang kamatayon, apan nagpaabot gihapon ang pamilya sa opisyal nga resulta sa imbestigasyon.
Nagpasalamat ang pamilya sa tanang mitabang sa pagpangita ni Joseph ug nangayo sila og pag-ampo alang sa kalinaw sa iyang kalag. Tungod sa kahimtang sa lawas nga nanimaho na, gipalubong kini sa gabii dayon human kini makuha gikan sa sapa.
| via Renante Socia Lada