Usa ka insidente ang nahitabo sa Barangay Lanao, Asturias, Cebu, diin usa ka service vehicle sa CEBECO III ang nahulog sa pangpang, hinungdan sa pagkamatay sa drayber nga si Jefferson Alloso, 37 anyos, taga Barangay Luray, Toledo City. Ang tulo ka uban niya nga pasahero, lakip na ang Barangay Kapitan sa maong dapit nga si Arnel Arnaiz, ug ang mga trabahante sa electric cooperative nga sila Bryan Villahermosa, 29, ug Christian Gentapa, 33, ang nangaangol. Sila nag-survey sa mga panimalay nga angay tauran ug elektrisidad sa maong dapit.
Ang insidente nahitabo mga alas 2:00 sa hapon niadtong Huwebes, Enero 30, human sa pag-uwan nga nakapadango sa dalan. Tungod sa kadangog sa dalan, wala makontrolar sa drayber ang pagmaneho, hinungdan nga nadalas ang sakyanan ug nahulog sa pangpang. Ang mga residente sa lugar miingon nga kung wala pa masangit ang sakyanan sa punoan sa lubi, posibleng nilahos pa kini sa mas lawom nga bahin sa pangpang.
Ang upat ka biktima gidala sa Asturias Infirmary diin gideklarar nga dead on arrival si Alloso. Ang usa sa mga naangol nga adunay head injury gibalhin sa Balamban Provincial Hospital alang sa dugang pagtagad.
Ang CEBECO III usa ka electric cooperative nga nagserbisyo sa mga lugar gikan sa Aloguinsan hangtod sa Asturias, Toledo City, ug pipila ka mga barangay sa Cebu City, Talisay, ug Minglanilla. (Renante Socia Lada)