Ning sunod-sunod na mga linog sa nagkadaiyang lugar ug ang pinakusog nga linog niigo sa nasud nga Turkey ug Syria niadtong nakalabay nga adlaw diin libuan ka mga kinabuhi ang nakalas ug mga nangaangol, ang kagamhanan sa Dakbayan sa Sugbo nangandam sa pagtubag sa linog ug mga katalagman.
Kagahapong adlawa Pebrero 7,2023 nagpahigayon og pakigtagbo ang Cebu City Disaster Risk Reduction and Management Office-CCDRRMO sa mga taga-Philippine Institute of Volcanology and Seismology (Phivolcs) kabahin sa pagbansay ug protocol mahitungod sa linog.
Si Harold Alcontin ang pangaulo sa CCDRRMO nibutyag nga “usa ni sa atong program this year. Kinahanglan naa ‘tay comprehensive nga response plan for earthquake.”
“Atong gibuhat karon part gyud ni sa atong disaster preparedness plan ilabina katong gibuhat nato sa niaging tuig sa last quarter nga nag-earthquake drill ta, Natayming lang nga naglinog sa Turkey. Usa ni sa atong program this year nga kinahanglan naa tay comprehensive nga response plan for earthquakes,” Dugang ni Alcotin.
Didto usab si Engr. Robinson Jorgio sa Philippine Institute of Volcanology and Seismology (Phivolcs-7) nga nitabang aron mas masabtan pag ayo ang mga lakang sa pagtubag sa mga katalagman sama sa linog.
Gitataw usab ni Alcotin nga “Usa ni sa atong gitan-aw nga mo set ta og protocol, nga kung moingon ta intensity 5 to 6 bakwit gyud ta, uli ta.” (Renante Lada)
(News & photo courtesy of Cebu City PIO)