Gi-abli na sa Cebu City ang ikaduhang Walang Gutom Kitchen (WGK) sa nasud isip kabahin sa padayon nga programa sa gobyerno aron masumpo ang kagutom ug masiguro nga ang mga pamilyang Pilipino adunay igo ug puno sa sustansyang pagkaon.
Giila kini isip usa ka paagi sa paghatag og dali ug direkta nga tabang sa mga nanginahanglan.
Ang maong pasilidad nga gidumala sa Department of Social Welfare and Development bukas gikan alas 6:00 sa buntag hangtod alas 3:00 sa hapon.
Nag-alagad kini og pamahaw ug paniudto ug makaserbisyo og mokabat sa 200 ka tawo kada adlaw, ilabi na sa mga senior citizens, kabatan-onan, mga trabahante, ug uban pang naa sa vulnerable ug marginalized sectors.
Kabahin sa mas lapad nga programa sa gobyerno, ang WGK dili lang para sa pagkaon kondili usa usab ka lugar diin ang mga benepisyaryo makadawat og ubang social services. Apil niini ang mga programa nga naghatag og suporta sa edukasyon ug pagpalambo sa kahibalo sa komunidad.
Gilauman nga pinaagi sa Walang Gutom Kitchen, mas mapalig-on pa ang kampanya batok sa kagutom ug mas daghan pang pamilya sa Cebu ang matabangan ug mahatagan og dignidad ug paglaum sa ilang adlaw-adlaw nga panginahanglan.
I via Renante Socia Lada