Gipahugtan sa Cebu Police Provincial Office (CPPO) uban sa Provincial Government sa Cebu ug mga lokal nga gobyerno ang kampanya alang sa kalinaw ug kahapsay sa mga komunidad ilawom sa “Safer Cities Initiative.” kagahapon Hunyo 21, 2026, miresulta kini sa pagdakop sa 533 ka mga suspetsado nga nakalapas sa lain-laing ordinansa sa tibuok probinsya sa Cebu.
Sumala sa report, nagbuhat og 236 ka operasyon ang mga pulis sa tibuok probinsya. Lakip sa mga paglapas nga ilang gitutukan mao ang pag-inom og ilimnong makahubog sa publiko (85 ka kaso), pagpanigarilyo sa bawal nga lugar (19), pagsuroy nga walay sando o shirtless (25), curfew violation sa mga menor de edad (75), dili awtorisadong videoke (3), ug mga paglapas sa traffic ordinances nga moabot og 326 ka kaso.
Sa 533 ka nadakpan, 326 ang gipangmultahan samtang 207 ang gipasidan-an ug gibuhian human ma-record ug mahatagan og hustong interbensyon. Nakaangkon ang kampanya og ₱159,850.00 nga fines ug penalties nga nakolekta gikan sa mga violators.
Ang pinakadaghan nga nadakpan natala sa Consolacion nga adunay 73, misunod ang Talisay (35), Liloan (32), Naga (31), Toledo (27), ug Barili (26).
Gidayeg ni Governor Pamela S. Baricuatro ang padayon nga kooperasyon sa kapulisan ug LGUs, ug mipasabot nga ang kalinaw ug kahapsay magsugod sa disiplina sa matag usa.
Giingon usab niya nga ang tumong sa programa dili lang ang pagdakop, kundili ang pagdasig sa responsableng pamatasan sa mga katawhan.
Gisupak usab ni PRO-7 Regional Director PBGen. Arnold Evangelista Abad ang maayong resulta sa kampanya, nga nagpakita sa kalig-on sa police visibility ug community partnership sa pagpugong sa kriminalidad.
Sa bahin ni CPPO Provincial Director PCOL Abubakar Udang Mangelen Jr., iyang gipasiugda nga ang kampanya dili lang para sa pagdakop kondili para sa pag-usab sa pamatasan sa mga tawo ug pagpalig-on sa disiplina sa komunidad.
Padayon ang CPPO sa ilang operasyon aron mapadayon ang kalinaw, kahapsay, ug mas lig-on nga kooperasyon sa publiko sa tibuok Cebu Province.
I via Renante Socia Lada