Paingon na untang mopauli sa ilang probinsya ang usa ka katabang sa fruit stand human nakadala ug kwarta ug alahas sa yang amo, apan way swerte kay naabtan man sa mga otoridad.
Niadtong Hunyo 11, 2024, alas 11:00 ang takna sa buntag, ang tag-iya sa maong fruit stand daling mitaho sa kapulisan sa Guadalupe Police Station, kabahin sa nahitabong pagpangawat sa iyang katabang nga si Raymund Villaflores nga nikuha ug nikawat sa iyang shoulder bag nga gisudlan sa iyang pitaka nga adunay kantidad nga PHP 60,000, mga alahas ug usa ka cellular phone.
Daling mihimo ug follow operation ang Guadalupe Police Station 9, Cebu City Police Office personnel ubos sa liderato sa PMAJ MILES B DAMOSLOG ug nihimo gilayon ug pakisusi sa dapit sa insidente sa impormasyon nga nakuha ang suspek sakay sa usa ka habal habal paingon sa Southbus Terminal.
Human niini, gibutyag sa biktima nga posibleng mopauli ang suspek sa iyang lungsod sa Tanjay Negros Oriental. Diha diha dayon ilang gitawagan ang Samboan Police Station sa Samboan diin adto kini manukad sa pagsakay ug barko paingon sa Tanjay. Abtik usab nga nakig-alayon ang mga personahe sa maong estasyonan sa Samboan MPS ug mihimo og hot pursuit operation batok sa Suspetsado nga maoy hinungdan sa pagkasikop niini. ug nabawi ang mga kinawat nga butang. Gidala dayon ang suspek sa Guadalupe PS alang sa tukmang pagpasaka og kaso. (Renante Socia Lada | Ting Joe Pepito)