Dako nga kalampusan ang nakab-ot sa kapulisan sa Police Regional Office (PRO7) human masikop ang duha ka indibidwal nga nalakip sa pinaka-most wanted sa Central Visayas atol sa manag lahi nga manhunt operations, Biyernes, Pebrero 21, 2025.
Sumala ni PBGen Redrico Maranan, Regional Director sa PRO7, nahimo kining posible tungod sa lig-on nga panaghiusa tali sa kapulisan, mga kauban nga ahensya, ug suporta sa komunidad aron mapadayon ang kalinaw ug kasiguruhan sa Region 7.
Dugang niya, nagpadayon ang kapulisan sa pagpalig-on sa seguridad, lakip na ang pagdugang sa mga pagpangronda, pagpatuman sa presensya sa kapulisan, ug epektibong anti-crime strategies alang sa mas luwas nga rehiyon.
Sa unang operasyon, usa ka 39-anyos nga truck driver nga nalista isip ika-walo (8th) sa most wanted sa rehiyon ang nasikop sa Sitio Sawsawan, Barangay San Roque, Talisay City, Cebu, alas-12:30 sa kaadlawon. Siya gidakop pinasikad sa warrant of arrest nga may kalabutan sa Republic Act 8353 o Anti-Rape Law of 1997, nga walay gitakdang pyansa.
Gihimo ang operasyon sa Provincial Intelligence Unit sa kaabag sa Talisay City Police Station ilawom sa Cebu Police Provincial Office (CPPO).
Sa ikaduhang operasyon, usa ka 31-anyos nga indibidwal nga nalista isip top 10 most wanted ang nasikop sa Sitio Ibabao, Barangay Agus, Lapu-Lapu City, Cebu. Siya gidakop sa Police Station 4 sa Lapu-Lapu City Police Office (LCPO) subay sa warrant of arrest alang sa Republic Act 9165 o Comprehensive Dangerous Drugs Act, nga walay gitakdang pyansa.
Ang duha ka mga dinakpan gidala na sa kapulisan alang sa dokumentasyon ug tukma nga disposisyon.
Ang PRO7 magapadayon sa ilang paningkamot batok sa kriminalidad aron masiguro ang kalinaw ug seguridad sa katawhan sa Central Visayas. (Renante Socia Lada)
(Source: PRO7-PIO)