Gidakop sa mga kapulisan sa Police Regional Office 7 (PRO7) ang usa ka konsehal sa barangay sa Lapu-Lapu City human kini pasakaan og kasong may kalabotan sa cybercrime, partikular sa digital o cyber libel, niadtong Mayo 29, 2025.
Gisaysay sa PRO7 ang pagdakop sa 56-anyos nga konsehal sa Purok Ube, Barangay Gun-ob, Lapu-Lapu City, sa pakig-alayon sa mga elemento sa Police Station 3 sa Lapu-Lapu City Police Office (LCPO) ug Technical Support Company sa Regional Mobile Force Battalion 7 (RMFB7) sa alas 4:20 sa hapon.
Ang akusado napasakaan og kasong paglapas sa Section 4(c)(4) (Cyber Libel) sa Republic Act No. 10175 o ang Cybercrime Prevention Act of 2012. Ang warrant of arrest gipagawas ni Presiding Judge Nelson G. Leyco sa Regional Trial Court Branch 27, Lapu-Lapu City, ubos sa Criminal Case No. R-LLP-25-00865-CR, niadtong Mayo 28, 2025.
Karon, nagpabilin ang akusado sa kustodiya sa kapulisan samtang nagpaabot sa pormal nga presentasyon sa korte.
Si PBGen Redrico A. Maranan, Regional Director sa PRO7, miingon nga ang maong pagdakop nagpakita sa seryosong paningkamot sa PRO7 batok sa cybercrime, bisan kinsa pa ang maapil, opisyal man o ordinaryong tawo.
“Cyber libel and other digital offenses are serious crimes with real-world impact, and we are committed to holding violators accountable,” segon ni PBGen Maranan.
Dugang pa niya, padayon ang pagpalig-on sa kapasidad sa PRO7 sa pagpakigbatok sa cybercrime pinaagi sa advanced training, digital forensics, ug intelligence-based operations.
Nagpabilin ang PRO7 nga hugot sa ilang tahas nga panalipdan ang digital nga kalubutan ug siguruhon nga ang mga molapas sa balaod silotan pinaagi sa legal ug hiniusang aksyon.
Source: PRO7
I via Renante Socia Lada