Nasangad kagabii, Martes, Septyembre 23, 2025, ang fast craft nga Ocean Jet 2 samtang paingon unta kini sa Getafe, Bohol gikan sa Cebu City. Segun sa Coast Guard District Central Visayas, luwas ra ang tanang 36 ka pasahero ug 17 ka tripulante nga sakay sa maong sakayan.
Nigikan ang Ocean Jet 2 sa Pier 1, Cebu City alas 6:45 sa gabii isip katapusang biyahe padulong Getafe. Apan sa dihang midangat kini sa tunga-tunga sa Jandayan Island ug Barangay Nasingin, nasangad kini ug di na makapadayon sa iyang rota.
Daling miresponde ang Philippine Coast Guard aron masiguro ang kahimtang sa mga pasahero ug tripulante. Niduol usab ang mga bangka nga panagatan sa lugar aron mutabang sa kaluwasan.
Matod sa PCG, walay nangaangol nga pasahero ug giila nga hapsay ang pagresponde sa mga awtoridad. Giingon nga dako og tabang ang pagdali sa koordinasyon sa mga lokal nga mangingisda ug sa Coast Guard.
Sa pagkakaron, padayon pa ang imbestigasyon sa hinungdan sa maong insidente. Gipasabot sa PCG nga magpabilin silang alerto ug maghimo og dugang lakang aron malikayan ang susamang panghitabo sa umaabot.
I via Renante Socia Lada