Cebu City – Gitakda nang mopuli ang kagamhanang probinsiyal sa pagduma sa estraktura sa CNBT (Cebu North Bus Terminal) sa dakbayan sa Mandaue samtang ang terminal moirog ngadto sa bag-ong location sa tunga-tungang bahin sa sunod buwan.
Segun sa news release, gipahibawo sa PIO o Provincial Information Office nga ang paradahan sa bus mobalhin ngadto sa SM City Cebu ug gitakda ang soft opening sa Oktubre 12 kay ang full operation sa Oktubre 15 pa man.
Niadtong wala pay pandemic, ang CNBT nga nagyaka sa Brgy. Subangdaku giduma sa kooperatiba sa mga bus operators sanglit ang gipadagan sa Kapitolyo mao ra man ang CSBT (Cebu South Bus Terminal) sa N. Bacalso Avenue, Cebu City.
Segun sa record, ang CNBT nag-okupar sa luna nga gipanag-iya sa gobyerno sa Mandaue nga gipaabangan sa kagamhanan sa Cebu City apan gipaduma ang terminal sa usa ka cooperative sa mga bus operators.
Ang lease agreement tali sa duha ka siyudad mapupos na karong sunod buwan.
Sa sayo pa, gipadayag sa kagamhanan sa Mandaue nga wa na kini interest nga i-renew ang kontrata kay ila nang gamiton ang maong luna.
Nunot sa pagtumaw sa pandemic, gisugdan sa Mandaue ang pag-ugmad sa terminal ngadto sa isolation facility. (Jhon Tadlip/ JTY)
(Source: Cebu Provincial Information Office)