Nasikop sa mga kapulisan sa Central Visayas ang usa ka 38-anyos nga construction worker nga giklasipikar isip No. 6 Regional Most Wanted Person sa rehiyon.
Gidakop ang suspek niadtong milabay nga adlaw sa Sitio Cawayanan, Barangay Maigang, Barili, Cebu. Giserbisyohan siya og warrant of arrest nga gi-isyu sa Regional Trial Court Branch 101 sa Talibon, Bohol niadtong Agosto 26, 2026.
Ang warrant batok kaniya may kalabotan sa tulo ka kaso sa Acts of Lasciviousness ubos sa Article 336 sa Revised Penal Code, nga may kalabotan usab sa Section 5(B) sa Republic Act 7610 o balaod nga nanalipod sa mga bata batok sa pag-abuso ug pagpahimulos.
Ang operasyon gipangulohan sa Inabanga Municipal Police Station sa Bohol, uban ang Regional Intelligence Unit 7, Bohol Police Intelligence Team ug Barili Municipal Police Station sa Cebu Police Provincial Office.
Matud ni PRO7 Regional Director PBGen Arnold E. Abad, nagpakita ang maong operasyon sa paningkamot sa kapulisan sa pagpangita sa mga wanted nga tawo ug pagpasaka kanila sa hustisya. Ang nadakpan nga suspek anaa na karon sa kustodiya sa kapulisan alang sa hustong proseso.
I via Renante Socia Lada