Gibisita sa National Nutrition Council Region 7 (NNC-7) ang programa nga Tandem Express sa RPN DYKC Cebu aron ipahibalo sa publiko ang kahimtang ug mga lakang bahin sa food and nutrition security sa rehiyon.
Si Mae Angelie Nacor Reponte, usa ka Project Development Officer sa NNC-7, kauban ang duha ka DevCom interns gikan sa Cebu Technological University-Main Campus nga sila si Geraldine Pelago ug Ella Mae Mari, maoy nagtuki sa kahulugan ug importansya sa food and nutrition security. Matod pa nila, kini nagpasabot nga ang matag pamilya adunay kasigurohan nga aduna silay access sa husto, sustansyado, ug luwas nga pagkaon aron masiguro ang maayong kahimtang sa lawas sa tanan.
Gipasiugda sa mga bisita nga ang pag-invest sa food and nutrition security usa ka importante nga lakang alang sa kalambuan sa nasud. Kung lig-on ang nutrisyon sa mga tawo, molig-on usab ang ilang abilidad sa pag-eskwela, pagtrabaho, ug pag-apil sa mga kalihokan sa katilingban. Apan kung aduna’y food insecurity, kini moresulta sa kakulang sa timbang, kahuyang sa lawas, ug kasaypanan sa pagtuon sa mga kabataan. Sa Central Visayas, bisan pa sa mga hagit, may nakita nga pag-uswag sa malnutrisyon status—ug kini positibo nga resulta nagpakita nga epektibo ang mga programa ug interbensyon nga gipangbuhat sa mga ahensya sa gobyerno ug partners niini.
Gisaysay usab ni Reponte nga ang promising nga resulta sa pagkunhod sa malnutrisyon sa Central Visayas nagikan sa kooperasyon sa lokal nga gobyerno, barangay, ug ubang stakeholders. Adunay mga kampanya sa edukasyon, feeding programs, ug koordinasyon sa mga eskwelahan aron masiguro nga ang mga kabataan makadawat ug husto nga nutrisyon. Dako usab ang papel sa mga ginikanan sa pagpahiangay sa pagkaon sa ilang panimalay ug sa pagsabot sa importansya sa paghatag ug sustansyado nga pagkaon sa ilang mga anak.
Bisan pa sa kalampusan, adunay gihapon mga hagit sama sa kakulang sa pondo, limitadong access sa pagkaon sa ubang lugar, ug kawalay kasayuran sa uban nga pamilya kabahin sa nutrisyon. Apan nagpadayon ang NNC-7 sa mga inisyatiba sama sa community education campaigns, partnerships sa NGOs ug pribadong sektor, ug pagpalig-on sa lokal nga mekanismo batok sa malnutrisyon.
Gihangyo usab nila ang tanang pamilya nga magsugod sa maayong praktis sa ilang panimalay, sama sa pagpili ug luto sa masustansya nga pagkaon, urban gardening, ug aktibong partisipasyon sa mga kalihokan sa barangay aron masiguro ang malungtarong kaayuhan sa ilang komunidad.
I via Renante Socia Lada