Nagsugod na kagahapong adlawa, Dec.10, 2025, ang National Housing Authority (NHA) sa pagpanagtag og pinansyal nga tabang para sa mga biktima sa Super Typhoon Odette sa 2021 sa Carcar City.
Ang tulo ka adlaw nga distribusyon gisugdan sa Barangay Poblacion 1, diin matag pamilya nga naapektuhan makadawat og ₱10,000 ubos sa Emergency Housing Assistance Program sa NHA.
Mahinumdoman, adunay ₱742 milyon nga gi-allocate ang NHA para sa mga biktima ni Odette, apan kini gipabalik sa National Treasury tungod kay wala magkauyon ang NHA ug ang miaging provincial administration sa pamaagi sa pag-implementar sa programa.
Niadtong Nobyembre 18, misulat si Gov. Pamela Baricuatro ngadto sa NHA General Manager aron hangyoon nga ibalik ang maong pondo para sa mga Sugbuanon nga nawad-an og balay sa bagyo sa Disyembre 2021.
Pipila ka adlaw pagkahuman, gisultihan siya ni NHA General Manager Joeben Tai nga gisugo ni President Ferdinand Marcos Jr. nga ipagawas ang pondo karong buwana.
Sa iyang sulat, giseguro ni Gov. Baricuatro ang NHA nga ang iyang administrasyon motuman ug mokuyog sa tanang guidelines sa ahensya.
Sumala sa NHA, ang Carcar City maoy unang LGU nga nakadawat og cash aid tungod kay kompleto ang ilang listahan sa beneficiaries.
Aron masiguro ang hapsay nga distribusyon, nagpadala usab ang Cebu Provincial Government og personnel aron makatabang sa NHA.
Source: Cebu Province PIO
I via Renante Socia