Nahasubo ang komunidad sa Maria Luisa Estate Park Subdivision sa Barangay Banilad, Cebu City human mapatay sa usa ka hit-and-run incident ang batan-ong Filipino-Chinese entrepreneur nga si Kingston Ralph Cheng, 23, pasado tungang gabii sa Domingo, Pebrero 8. Ang insidente nahitabo sulod mismo sa high-end subdivision diin residente ang biktima.
Sumala sa report sa kapulisan sa Cebu City Police Office (CCPO) gidala pa sa ospital si Cheng apan wala na gyud siya maluwas tungod sa grabeng mga samad nga iyang naangkon. Naila ang biktima dili lamang isip negosyante—tag-iya sa usa ka luxury coffee shop sa Cebu Business Park, usab isip talentado nga violinist nga aktibo sa kalibutan sa musika.
Giila sa kapulisan ang suspek nga si Sean Andrew Pajarillo, 21, residente usab sa maong subdivision ug nagmaneho sa usa ka Toyota Innova. Sa inisyal nga imbestigasyon, unang nabanggaan sa suspek ang usa ka nakapark nga Toyota Vios apan wala kini muhunong.
Human niini, nadasmagan pa niya ang naglakaw nga si Cheng.
Human sa insidente, misulay pa unta og layas ang suspek apan nalimbuwad ang iyang sakyanan hinungdan nga siya usab naangol ug nadala sa usa ka pribadong tambalanan. Didto, gipailalom siya sa “hospital arrest” sa Traffic Enforcement Unit sa Cebu City Police Office.
Matod sa kapulisan, wala makapakita og balido nga driver’s license, lakip na ang Official Receipt ug Certificate of Registration sa sakyanan ang suspek. Gipasakaan na siya og kaso nga Reckless Imprudence Resulting to Homicide and Damage to Property, samtang gitan-aw pa ang posibilidad sa dugang nga kasong kriminal subay sa resulta sa padayon nga imbestigasyon.
I via Renante Socia Lada