Gisuspenso sa daghang Local Government Units (LGUs) ang face-to-face classes sa tanang lebel, publiko ug pribado, karong Martes, Pebrero 10, 2026, tungod sa padayon nga kusog nga ulan nga gimugna sa shear line effects. Imbis nga pisikal nga klase, gipahigayon ang alternative delivery modes aron mapadayon gihapon ang pagkat-on sa mga estudyante.
Lakip sa mga LGU nga nagpatuman sa class suspension mao ang Daanbantayan, Tabogon, Medellin, Catmon, Cordova, Tabuelan, Talisay City, Minglanilla, Consolacion, Argao, San Fernando, Balamban, Danao City, Toledo City, Liloan, Compostela, Mandaue City, Aloguinsan ug Sibonga. Apil usab sa gisuspenso ang klase ang Cebu City ug Lapu-Lapu City.
Sumala sa mga lokal nga opisyal, ang lakang gihimo isip preventive measure aron masiguro ang kaluwasan sa mga estudyante, magtutudlo ug kawani sa eskwelahan. Giila nga delikado ang pagbiyahe ug posibleng motunga ang baha ug landslide sa pipila ka lugar tungod sa padayon nga ulan.
Gipasiugda usab sa mga LGU nga ang kahimtangan sa panahon padayon pang gimonitor, ug andam silang mohimo og dugang nga aksyon kon magpadayon o mosamot pa ang ulan. Ang mga eskwelahan giaghat nga sundon ang direktiba sa lokal nga pangagamhanan ug sa Department of Education bahin sa implementasyon sa alternative learning modes.
Samtang naghulat sa sunod nga pahibalo, gidasig ang publiko nga magtan-aw ug mosunod sa opisyal nga Facebook pages sa ilang tagsa-tagsa ka LGU alang sa verified ug pinakabag-ong updates. Matod sa Capitol PIO, ang listahan sa mga lugar nga adunay class suspension mahimong madugangan depende sa kahimtangan sa panahon.
Source: Cebu Capitol PIO
I via Renante Socia Lada