Nadakpan sa kapulisan ang Top 2 Municipal Most Wanted Person sa lungsod sa Medellin, Cebu human sa usa ka intelligence-driven nga operasyon sa Barangay Panugnawan niadtong Pebrero miaging adlaw. Ang operasyon gipangulohan sa mga sakop sa Medellin Municipal Police Station.
Ang nadakpan giila lamang sa alyas nga “Titing,” 47 anyos, residente sa Purok Mahigugma-on, Barangay Panugnawan, Medellin, walay trabaho. Nadakpan siya sa Tracker Team sa Medellin MPS pinaagi sa pagserbisyo sa usa ka Warrant of Arrest.
Sumala sa kapulisan, ang warrant gipagawas sa Regional Trial Court Branch 79 sa Bogo City tungod sa paglapas sa Section 5, Article II sa Republic Act 9165 o Comprehensive Dangerous Drugs Act. Wala usab girekomendar ang piyansa alang sa iyang kaso.
Sa dihang gisearch ang suspek human sa legal nga pagdakop, narekober sa kapulisan ang usa ka caliber .38 revolver nga adunay duha ka bala. Tungod niini, gipasakaan pa siya og laing kaso alang sa paglapas sa Republic Act 10591 o balaod batok sa ilegal nga pagpanag-iya sa pusil ug bala.
Matod sa rekord sa kapulisan, nalambigit na usab ang suspek sa usa ka buy-bust operation niadtong Agosto 7, 2025 apan nakalikay kini sa pagdakop kaniadto. Karun, gitanggong na siya sa Medellin Police Station samtang naghulat sa pagbalhin sa korte. Giingon sa Cebu Police Provincial Office nga magpadayon ang ilang operasyon batok sa mga wanted person aron masiguro ang kaluwasan ug kahapsay sa probinsya.
Source: CPPO
I via Renante Socia Lada