Mikabat sa 620 ka pamilya gikan sa barangay Pamutan ug Toong ang nakadawat og hinabang pinansyal ubos sa Emergency Housing Assistance Program (EHAP) sa National Housing Authority (NHA).
Ang matag pamilya gihatagan ug ₱10,000 nga cash aron makatabang sa pagtukod pag-usab sa ilang mga panimalay human sa kadaot nga gipahinabo sa Bagyong Odette.
Si Cebu City Mayor Atty. Raymond Alvin Garcia ang nangulo sa pag-apod-apod sa mga hinabang, nga nagpasiugda sa pasalig sa kagamhanan sa Siyudad sa Sugbo labi na sa pagsuporta sa mga apektadong pamilya.
Tumong sa maong programa ang paghatag og tabang alang sa pagpaayo sa mga balay nga grabing naapektuhan sa super typhoon.
Ang pag-apod-apod nagpakita sa padayon nga mga paningkamot sa Cebu City Government, kauban ang NHA, aron mahatagan og hinabang ug recovery ang mga komunidad nga naapektuhan sa kalamidad. (Renante Socia Lada)
(Source: Cebu City PIO)