Nagtugyan og bag-ong mga classroom nga andam bisan pa og adunay kalamidad ang nasudnong gobyerno sa Bogo City sa amihanang Cebu.
Gipangulohan ni Presidente Ferdinand Marcos Jr. ang turnover sa mga classroom kagahapon Marso 16, 2926, aron masiguro nga makapadayon gihapon ang pag-eskwela sa mga estudyante bisan pa og adunay kalamidad sama sa kusog nga linog nga miigo sa amihanang Cebu sa miaging tuig.
Kauban sa presidente sa maong kalihokan sila Gob. Pamela Baricuatro, Mayor Mayel Martinez ug Deped Sec. Sonny Angara. Gisusi nila ang mga bag-ong classroom nga gitukod sa Marcelo B. Fernan–Polambato Elementary School. Ang mga classroom gitawag og Learning Continuity Spaces (LCS) nga adunay solar power, internet connection alang sa digital learning ug kaugalingong kasilyas.
Ang matag classroom makasud og hangtod 40 ka estudyante ug nagkantidad og mga ₱1.65 milyon matag unit. Gawas sa maong eskwelahan, nakadawat usab og LCS ang Binabag Elementary School.
Sa maong pagbisita, gilusad usab ni Marcos ang YAKAP at Kalinga Caravan, usa ka programa nga naghatag og libreng serbisyo sa panglawas alang sa mga estudyante, magtutudlo ug ilang pamilya. Adunay mga doktor nga naghatag og konsultasyon, laboratory test, tambal ug tabang sa pagparehistro sa PhilHealth.
Sa hapon, mitambong usab ang presidente sa mass oath-taking sa 3,325 ka bag-ong na-promote nga public school teachers ug school heads gikan sa 44 ka lungsod sa Cebu Province.
Gipahigayon ang seremonya sa IEC Convention Center sa Cebu City, diin gipapanumpa sila ni Education Secretary Sonny Angara.
Sumala ni Gob. Baricuatro, padayon ang suporta sa Cebu Provincial Government sa pagpalambo sa edukasyon tungod kay importante ang papel sa mga magtutudlo sa paghulma sa kahibalo ug kaugmaon sa kabatan-onan.
Human sa kalihokan, mibisita usab ang presidente sa eGovPH Serbisyo Hub sa Barangay Subangdaku, Mandaue City uban ni Jonkie Ouano. Ang maong hub usa ka one-stop center diin nagtapok ang nagkalain-laing ahensya sa gobyerno aron mas paspas ug sayon ang pagkuha sa serbisyo sa publiko.
Source: Cebu Province PIO
I via Renante Socia Lada