Usa ka trahedya ang nahitabo sa 33-anyos nga lalaki nga taga Barangay Gun-ob, Lapu-Lapu City, human kini napalgan nga patay samtang namana og isda sa dagat pasado alas 7 sa buntag, Sabado, Oktubre 18, 2025.
Sumala sa inisyal nga impormasyon, ang biktima uban sa iyang kuyog milangoy sa dagat aron mamana og isda, apan wala na kini makabalik sa ibabaw human sa pipila ka oras. Pag-abot sa alas 9 sa buntag, nabantayan kini sa iyang kuyog nga anaa na sa ilawom nga bahin sa dagat ug wala na nagginhawa, hinungdan nga dali nilang gipahibalo ang mga awtoridad ug gipahunong ang pagpamana.
Sa usa ka post sa social media, Lapu-Lapu City Mayor Cindi King-Chan nagpahayag sa iyang kabalaka ug kaguol sa panghitabo.
Dugang pa sa mayor, gipaabot niya ang iyang pahasubo sa pamilya nga gibyaan sa biktima ug nanawagan sa mga mamana nga magpuyo nga alerto ug mag-amping sa panahon sa pagpamana, ilabi na kon nag-inusara o nagbuhat niini sa lawom nga bahin sa dagat.
Karon, padayon pa ang imbestigasyon sa kapulisan ug sa Lapu-Lapu City Disaster Risk Reduction and Management Office (CDRRMO) aron masuta kung unsay hinungdan sa pagkamatay sa biktima.
I via Renante Socia Lada