Misaka na sa 70 ang ihap sa patay human sa kusog nga magnitude 6.9 nga linog nga miigo sa Amihanang Sugbo, human makuha ang tulo ka lawas gikan sa naguba nga Condor Pension House sa Barangay Gairan, Bogo City kagabii, Miyerkules, Oktubre 1.
Nailhan ang mga biktima nga sila si Mercidita Balleta (42 anyos), Jema Hilig (30s), ug iyang 4-anyos nga anak nga gitawag og “John.” Ang tulo natabonan sa daghang pundok sa semento ug kahoy dihang naguba ang duha ka andana nga building atol sa linog.
Base sa imbestigasyon, bag-o pa lang misugod sa iyang night shift si Jema isip receptionist, pulihan unta niya si Balleta. Ang iyang partner nga si Isagani Gelig nagdala sa ilang anak aron makapahuway didto samtang siya mag-duty isip security guard. Sa kasakit nga pamahayag ni Gelig, giingon niya nga unta mosugod na og daycare si John pagkasunod adlaw, “pero wala na gyud miabot ang iyang ugma.”
Sumala sa mga otoridad, nadiskobrehan ang mga lawas duol sa entrance sa maong pension house nga natabonan sa konkretong poste ug bongbong. Nila sa 53rd Engineering Brigade, BFP Search and Rescue, Mandaue CDRRMO, ug Philippine Coast Guard ang nagtinabangay nga mipaningkamot sulod sa daghang oras aron makuha ang mga lawas gikan sa kagubot.
Kini nga trahedya midugang sa kasamtangang 70 ka kumpirmadong patay nga narehistro sa Bogo Provincial Hospital. Padayon ang search ug recovery operations sa tibuok Amihanang Sugbo samtang nagdali ang mga rescuer sa pagpangita sa posibleng buhi pa ug sa pagkuha sa mga lawas nga wala pa makit-i.
I via Renante Socia Lada