Nasikop sa entrapment operation sa National Bureau of Investigation-Central Visayas Office (NBI-CEVRO) ang usa ka lalaki nga nagpakaaron-ingnon nga cosmetic surgeon human ni-reklamo ang usa ka transgender woman nga nahimong biktima sa iyang illegal nga serbisyo.
Ang suspek giila nga si Roel Fernandez Bacus, alyas “Mommy Bebs,” nga nagpuyo sa Sitio Baskio, Barangay Basak Pardo, Cebu City. Sumala ni NBI-CEVRO Regional Director Rennan Augustus Oliva, nagpasaka og reklamo ang biktima, usa ka residente sa Barangay Agus, Lapu-Lapu City, human nga nahitabo ang infection ug nihubag ang iyang bat-ang (hips) dihang gioperahan kini sa UCMed aron tangtangon ang “illegal silicone oil” nga gi-inject kaniya sa suspek.
Ang transgender woman nibayad ug P20,000 alang sa maong serbisyo, nga gihimo niadtong Oktubre 2024 sa usa ka suite sa condominium sa North Reclamation Area, Cebu City. Ang suspek mipatuo nga siya usa ka “aesthetician” ug licensed physician, apan sa pag-verify sa Professional Regulation Commission (PRC), wala kini nalista isip doktor.
Pagkahuman sa operasyon, nakasinati ang biktima og infection ug nagpa-ospital, hinungdan nga midangop kini sa NBI aron ireklamo ang suspek. Ang NBI dayon nagpahigayon ug entrapment operation pinaagi sa usa ka igsoon ug higala sa biktima nga nagpaka-arun-ingnon nga magpa-inject usab. Nadakpan ang suspek sa iyang balay sa Barangay Basak Pardo sa dihang nadawat niini ang “marked money” nga adunay yellow fluorescent powder, nga positibo sa eksaminasyon sa NBI laboratory.
Ang suspek, nga giingong gradwado sa kurso nga Education, gipasaka na og kaso sa piskaliya alang sa Illegal Practice of Medicine ug Estafa. Gipahugtan usab ang pag-imbestiga sa uban pang biktima sa suspek aron mapalapdan ang kaso.
Padayon ang pahimangno sa mga awtoridad nga magbantay batok sa mga peke nga doktor aron malikayan ang mga peligro nga posibleng makaapekto sa kahimsog ug kinabuhi. (Renante Socia Lada)