Usa ka chainsaw operator nga na missing sulod sa pila ka adlaw ang nakit-ang patay sa sulod sa usa ka sinkhole sa lungsod sa Carmen, Sugbo.
Ang biktima giila nga si Alex Bejoc Capuyan, 35 anyos, nga adunay live-in partner ug nagpuyo sa Lower Barangay Natimao-an, Carmen. Ang iyang patayng lawas nadiskubre kagahapon sa buntag, Disyembre 11, sa Purok Mahogany, Barangay Sac-on, sulod sa usa ka sinkhole nga giladmon og 30 ka tiil.
Sumala sa imbestigasyon sa Carmen Police Station, na-missing si Capuyan niadtong gabii sa Disyembre 7. Nasayran nga hubog kini sa dihang nilakaw gikan sa ilang balay ug wala na nakabalik. Ang iyang pamilya nangayo og tabang sa mga opisyal sa barangay sa pagpangita kaniya.
Kagahapon, usa ka barangay konsehal maoy nakakita sa patayng lawas ni Capuyan sa sinkhole. Dayon gipahigayon ang retrieval operation nga gipangunahan sa mga sakop sa Municipal Disaster Risk Reduction and Management Office (MDRRMO) ug Bureau of Fire Protection (BFP). Human sa pipila ka oras nga operasyon, nakuha ang lawas nga anaa na sa advanced state of decomposition.
Padayon ang imbestigasyon aron matino kung adunay ba kini foul play o aksidenti lang ang maong panghitabo. (Renante Socia Lada)