Gimanduan ni Bohol Governor Erico Aumentado ang kapolisan sa lalawigan nga aksyonan ug sulbaron ang pagka wala sa tulo ka mga tawo nga wala pa makita sulod sa kinse ka adlaw sukad sa insidente nga nahitabo sa Tagbilaran City.
Sa usa ka Facebook post kagahapong adlawa, Disyembre 12, 2024 gibutyag ni Aumentado ang iyang direktiba ngadto sa Provincial Director nga si Arnel Banzon ug Tagbilaran City Police Chief PLTCOL John Kareen Escober. “Gimanduan nato nga palapdan ang ilang imbestigasyon kabahin sa nawala nga K9 employee sa Kapitolyo. Aduna kitay giandam nga reward alang sa bisan kinsang maka-hatag ug impormasyon kabahin niini ug sa uban pang biktima,” matud sa gobernador.
Ang mga biktima mao si Christian Micabani, 23, usa ka K9 staff sa Kapitolyo; iyang amahan nga si Noel Micabani, 43; ug ang higala nilang si Mat Ryan Dugaduga, 44. Sila gidagit niadtong Nobyembre 27 sa Barangay Dao, Tagbilaran City, pinaagi sa mga armadong kalalakin-an.
Narekober na sa kapolisan ang sakyanan ni Dugaduga, usa ka white Toyota Rush, nga nahibal-an nga gibilin sa Barangay Candaigan, Loon. Apan hangtod karon, wala pa gihapon mahibal-an ang lokasyon sa tulo ka biktima.
Sa pagsaysay sa kapolisan, si Noel ug Dugaduga gipasakay una sa usa ka van sa dili momenos walo ka suspek. Human niini, giapil usab si Christian nga gitawag gikan sa iyang trabaho sa Kapitolyo. Gidala usab sa mga suspek ang sakyanan ni Dugaduga.
Si Christian, usa ka gradwado sa kursong Criminology, samtang ang iyang amahan nagtrabaho isip wedding organizer kauban ang iyang asawa. Si Dugaduga, sa laing bahin, nalambigit kaniadto sa ilegal nga droga niadtong 2017 ug giingong apil usab sa usa ka shooting incident nga nibiktima ug usa ka seaman sayo niining tuiga.
Padayon ang panawagan sa mga pamilya sa biktima alang sa mas paspas nga aksyon ug ang ilang hangyo nga makita na ang ilang mga mahal sa kinabuhi. Gipadayon usab sa kapolisan ang mas lawom nga imbestigasyon aron matino ang motibo ug madakpan ang mga responsable sa insidente. (Renante Socia Lada) photo courtesy of Bohol Gob. Aumentado