Naila na ang biktima sa aksidente nga nahitabo alas 3:30 sa hapon sa Sitio Libo, Barangay Tayud, diin usa ka nagmotorsiklo ang patay human naligsan sa usa ka trailer truck.
Ang biktima mao si Leo Vanzuela Esplago, 24 anyos, residente sa Bulacao, Cebu City, ug nagmaneho sa motorsiklo nga ABC125 nga adunay plate number G782MI.
Ang driver sa Sinotruck Tractor nga nakaligsan kaniya giila nga si Nieve Timanono Suya, 45 anyos, minyo, ug residente sa Barangay Okoy, Sta. Fe, Bantayan Island.
Base sa inisyal nga imbestigasyon ni PSSg Adalim Gemini, ang duha ka sakyanan nagbyahe padulong sa northern direction. Pag-abot sa maong dapit, naigo ang motorsiklo sa trailer truck hangtod nga naligsan ang biktima, nga maoy hinungdan sa iyang dihang-dayon nga pagkamatay.
Padayon ang kapulisan sa pag-imbestigar aron masuta ang tukmang hinungdan sa aksidente ug kung adunay igong kaso nga ipasaka batok sa drayber sa truck.
I via Renante Socia Lada