Miigo ang dako nga sunog sa Sityo All Season, Barangay Cogon Pardo, Cebu City sa gabii sa Disyembre 9, 2025, nga miresulta sa ₱3.7 milyon nga danyos. Nadawat sa Cebu City Fire Office ang alarma alas 6:14 sa gabii, ug dali silang miresponde sa lugar.
Sumala sa inisyal nga impormasyon, nagsugod ang kalayo sa balay ni Anecito Pelones Jr. ug Desirene Mansa human sila makadungog og wire nga naputol ug mitapot sa atop sa ilang balay. Paspas ang pagkaylap sa kalayo ug mituhop sa uban pang mga kabalayan.
Tungod sa pagdako sa sunog, gisaka kini sa ikaduhang alarma ug pagkahuman sa pipila ka minutos, niabot sa ikatulong alarma. Lisod usab sudlon ang lugar kay dili makasulod ang fire truck, maong hose-to-hose ang gibuhat sa mga bombero aron maabtan ang nagkalapad nga kalayo.
Inisyal nga pagtala sa CCFO nagpakita nga 40 ka balay ang naugdaw ug 75 ka pamilya o 225 ka indibidwal ang nawad-an og panimalay. Wala usab makakuha ang tagbalay bisan usa ka butang tungod kay kusog kaayo ang pagdako sa kalayo.
Padayon karon ang imbestigasyon sa CCFO aron masuta ang tinuod nga hinungdan sa sunog ug aron mahatagan og tukmang giya ang mga apektadong residente.
I via Renante Socia Lada