Wala nay kinabuhi nga niabot sa tambalanan ang usa ka batan-on nga nagmaneho sa iyang bisiklita human nga nadasmagan sa van ug napantok ang ulo sa dalan, sa Sitio Tapon, Barangay Tinaan, City of Naga Cebu, niadtong Sabado sa mga alas 5:00 pasado sa hapon, Agosto 10, 2024.
Ang biktima giila nga si Keiji Dela Cruz Luga, 23-anyos, ug taga-Sitio Silangan I, Brgy.Tinago sa dakbayan sa Sugbo.
Sa inisyal nga imbistigasyon sa kapulisan, nasayran matud pa sa nakakita nga nasarasay ang biktima gumikan kay nahulog sa gamay’ng libaong ang ligid sa bisiklita, hinungdan nga nasaghiran kini sa van ug natumba nga niresulta sa pagkabunal sa ulo niini sa sementadong dalan.
Gisuwayan pa kini pagdala sa pinakaduol nga tambalanan, apan gideklarar sa nag-atiman nga doktor nga wala nay kinabuhi ang biktima.
Kasamtangan usab nga gikustodiya ang maong driver sa van sa Naga Police Station alang sa dugang imbestigasyon. (Ting Joe Pepito & Renante Socia Lada)