Ang suspetsadong kawatan nga nailhan nga si Bryan Cansancio Magnanao, alyas Ryan Cansancio Bacalla, 34 anyos, nga taga Sityo Balagnan, Barangay Lalong, Calatrava, Negros Occidental, nadakpan sa hiniusang operasyon sa kapulisan sa alas 8:30 sa gabii sa Sabado, Marso 15, 2025.
Gidakop siya samtang paingon kanaog gikan sa barko nga midunggo sa pantalan sa Barangay Poblacion, Dakbayan sa Toledo.
Si Bacalla nagawsan og warrant of arrest alang sa kalapasan sa Section 11, Article 2 sa RA 9165 o Dangerous Drugs Act of 2002, nga giluwatan ni Hon. Judge Jose Alfonso Gomos sa RTC Branch 5, Lapu-Lapu City, Cebu, niadtong Setyembre 30, 2021, nga adunay piyansa nga ₱200,000 aron temporaryo siyang buhian.
Ang operasyon gipangulohan ni PLtcol. Jewel Nicanor sa City Intelligence Unit (CIU) sa Lapu-Lapu City Police Office ug ni PLtcol. Wilfredo Alarcon, hepe sa Toledo Police Station, uban ang tabang sa Philippine Coast Guard Toledo ug PNP Maritime.
Sa pagdakop kang Bacalla, kuyog niya ang iyang ig-agaw nga si Mariel Cansancio Banguiran, 30 anyos, nga taga Purok Caimito, Barangay Sibago, Pinamungajan, Cebu. Si Banguiran nadakpan usab tungod sa pagdala og kalibre .9mm nga armas nga adunay magazine nga sulod ang 14 ka bala, ug laing magazine nga adunay 11 ka bala.
Gawas sa warrant of arrest, nakuhaan usab si Bacalla og tulo ka gramos nga shabu nga gibanabana nga nagkantidad og ₱20,400 base sa standard drug price.
Nasayran nga si Bacalla maoy positibong nagtugma sa mga hulagway sa kawatan nga nag-viral samtang nangawat sa usa ka panimalay sa Koreano sa Dakbayan sa Lapu-Lapu, diin nagbahag ra siya atol sa pagpangawat. Ang maong insidente nahitabo niadtong Marso 9, 2025, sa Barangay Maribago, Lapu-Lapu City, diin nakuhaan sa CCTV footage ang kawatan nga nag-underwear ra samtang nanglungkab ug nangawat og vault sulod sa usa ka panimalay sa usa ka subdivision. (Renante Socia Lada)