Nag-isyu og show cause order ang Land Transportation Office 7 (LTO-7) batok sa upat ka motorista nga nasakpan nga nag-illegal racing sa Centennial Road, Cordova, alas 11:00 sa gabii niadtong Pebrero 17, 2026.
Sumala sa LTO-7, nailhan ang mga nalambigit pinaagi sa tabang sa kapulisan sa Cordova. Ang mga motorista nag-edad og 15, 16, ug 18 anyos, ug nasuta nga ang pipila kanila wala’y driver’s license.
Gipahimangnoan ang upat ka indibidwal nga mopasabot sa ilang gibuhat ug ipresentar ang ilang panig sa maong isyu. Ang show cause order maoy paagi sa ahensya aron mahibaw-an kung unsay angay nga silot nga ipahamtang kanila.
Kung mapamatud-an ang paglapas, posible silang mahatagan og permanent disqualification sa pagkuha og driver’s license.
Gawas pa niini, posibleng manubag usab ang mga registered owners sa mga motorsiklo nga gigamit. Mahimo silang maapektohan sa preventive suspension sa lisensya sulod sa usa ka tuig ug kanselasyon sa rehistro sa sakyanan nga nalambigit sa illegal racing.
📸 Contributed
I via Renante Socia Lada