Mitambong si Cebu Governor Pamela Baricuatro sa selebrasyon sa Japan’s National Day Reception niadtong Pebrero 20 nga gipahigayon sa Consulate-General of Japan sa Cebu. Ang maong kalihokan gihimo usab isip pagsaulog sa ika-66 nga adlaw nga natawhan sa Emperor sa Japan.
Ang programa gipanguluhan ni Consul-General Yudai Ueno ug gitambongan sa nagkalain-laing lokal nga opisyal lakip si Cebu City Mayor Nestor Archival, mga miyembro sa diplomatic community ug mga lider sa negosyo. Gipakita niini ang lig-on ug dugay nang relasyon tali sa Cebu ug Japan.
Sa iyang mensahe, nagpasalamat si Gov. Baricuatro sa padayon nga suporta sa Japan sa probinsya sa Cebu, labi na sa teknolohiya, panglawas, pag-andam sa kalamidad ug pagpalambo sa ekonomiya.
Matud pa sa gobernadora, ang Japan usa ka kasaligan nga partner ug maayong ehemplo sa disiplina, episyente nga pangdumala ug pag-atiman sa komunidad. Miingon usab siya nga daghan pa’g makat-unan ang Cebu gikan sa maayong pamaagi sa Japan.
Gipahibalo usab ni Gov. Baricuatro nga mobiyahe siya paingon sa Japan niining semanaha alang sa opisyal nga mga kalihokan nga magpokus sa panglawas, disaster preparedness, patigayon ug kooperasyon sa ekonomiya. Dugang pa niya, bukas ang Cebu sa mga Japanese partners ug investors nga gustong mamuhunan sa probinsya.
Gilauman niya nga magpadayon ang maayong panag-uban sa Cebu ug Japan sa umaabot nga mga tuig.
Source: Cebu Province PIO
I via Renante Socia Lada