Usa ka 52-anyos nga motorcycle driver ang namatay ug napaig human sa usa ka aksidente nga nahitabo sa National Highway, Barangay Tina-an, alas-11 sa gabii, Nobiyembre 30, 2024.
Ang biktima mao si Genolito Ramerez Ib-ib, taga Barangay Guadalupe, Dakbayan sa Sugbo, bag-o lang nakauli gikan sa Canada alang sa usa ka bakasyon.
Nabangga kini sa Aluminom Van nga gimaneho ni Teodoro Gador Matillano III, 49- anyos, residente sa Bais City, Negros Oriental.
Base sa imbestigasyon sa Naga City Police, nasayran nga samtang nagmaneho si Ramerez , nalapas kini sa pikas linya nga ni resulta sa pagka bangga sa van.
Sa kakusog sa impact nidilaob ang motor ug naapil sa pagka paig ang biktima.
Gipaningkamotan sa mga residente sa lugar nga mapalong ang kalayo gamit ang tubig, apan ang biktima namatay tungod sa grabeng pagkasunog sa iyang lawas.
Sumala sa pamilya ni Ramerez, tulo pa lang ka adlaw sukad sa iyang pag-abot gikan sa Canada. Paingon unta kini sa Negros aron bisitahon ang paryente. Kini nga biyahe mao ang unang lakaw niya human sa iyang pag-abot sa Sugbo.
Ang driver sa Aluminom Van, si Matillano, kasamtangang anaa sa kustodiya sa Naga City Police samtang naghulat sa desisyon sa pamilya sa biktima.
Ang kapulisan nagpadayon sa imbestigasyon aron matino ang hinungdan sa aksidente ug ang mga posibleng kaso batok sa driver sa van. (Renante Socia Lada)