Sa pagdumala sa Sinulog 2026 Grand Parade karong Domingo, Enero 18, 2026, magpatuman ang Cebu City og daghang road closures ug traffic rerouting sugod alas 4:00 sa kadlawon aron masiguro ang kaluwasan ug hapsay nga dagan sa parada, mga partisipante, ug manan-aw.
Ang ruta sa parada magsugod sa Cebu City Sports Center, moagi sa P. Del Rosario Street hangtod Imus Road, moliko paingon sa General Maxilom Avenue, moagi sa Fuente Circle, padulong sa Osmeña Boulevard, moliko sa R. Landon Extension, ug mobalik sa Cebu City Sports Center.
Gipahibalo nga magpabiling bukas ang Colon Street alang sa pribadong mga sakyanan, samtang kanunay nga bukas ang emergency lanes aron walay babag ang pag-agi sa mga ambulansya ug uban pang emergency vehicles.
Magpahimutang og traffic personnel sa tibuok ruta sa parada ug mga dapit nga sarado ang dalan aron magdumala sa trapiko ug motabang sa mga motorista ug mga naglakaw. Gihangyo ang publiko nga likayan ang ruta sa parada, mogamit og alternatibong dalan, ug maggahin og dugang oras sa biyahe tungod sa posibleng kalangan sa trapiko.
Nagpasalamat ang Cebu City Transportation Office sa kooperasyon sa tanang katawhan alang sa luwas ug hapsay nga dalan. Viva Pit Señor!
Source: Cebu City Transportation Office
I via Renante Socia Lada