Usa ka 11-anyos nga batang babaye ang napalgang patay sa sapa sa Sitio Kanipaan, Barangay Basak, Mandaue City, pasado alas 6 sa buntag karong Martes, Hunyo 10, 2025.
Giila ang biktima nga si Erica Cabatingan, residente sa Purok Orchids, Sitio Alliance sa maong barangay. Sumala sa amahan nga si Eduardo Cabatingan, milakaw si Erica niadtong niaging adlaw aron mangolekta ug manglabay og basura sa silingan, aron makakwarta ug makapalit og pagkaon.
Nanilhig pa kini sa balay sa iyang apohan, apan kalit na lang nga nawala ug wala na makapauli. Gisugdan sa pamilya ang pagpangita kaniya pagkahapon hangtod sa buntag apan wala kini makita. Hangtod nga usa ka residente ang nakakita sa lawas ni Erica nga naglutaw sa sapa.
Gikumpirmar sa ginikanan nga mao gayud kini ang ilang anak. Gituohan sa pamilya nga posible kini nga nakasinati og seizure nga hinungdan sa iyang pagkahulog sa tubig. Nagpahimangno ang mga opisyal sa barangay sa mga ginikanan nga mas magbantay sa ilang mga anak, ilabi na kung aduna kini’y kondisyon sa panglawas. Gipaabot pa ang opisyal nga resulta sa imbestigasyon ug medical examination aron masayran ang tinuod nga hinungdan sa kamatayon.
via Renante Socia Lada