Sa mas pinakusgang kampanya batok sa ilegal nga drogas, nakab-ot sa Cebu Police Provincial Office (CPPO) ang dako nga kalampusan human madakpan ang 1,221 ka tawo ug masakmit ang kapin ₱50 milyon nga kantidad sa ilegal nga drogas gikan Enero 12 hangtod Hunyo 8, 2025.
Sa kinatibuk-ang 850 ka operasyon, nasakmit sa mga sakop sa CPPO ang 7,350.945 gramos nga shabu nga gibana-banang nagkantidad og ₱49,986,426.00. Lakip usab sa narekober ang 306 gramos nga uga nga dahon sa marijuana ug 700 ka stalks, nga adunay street value nga ₱176,720.00. Ang kinatibuk-ang kantidad sa tanang nasakmit nga drogas miabot sa ₱50,163,146.00.
Gawas sa mga nadakpan, ang CPPO nakapasaka og 1,962 ka kaso may kalabutan sa drogas sa korte, usa ka timaan nga seryoso ang ilang tumong nga dili lang dakpon ang mga kriminal, kundi ipaagi gyud kini sa hustisya.
Sumala ni Police Colonel Jovito M. Atanacio, Acting Provincial Director sa CPPO nga kini klaro ug kusog nga mensahe ngadto sa tanang nagpahimulos sa kadaot nga dala sa ilegal nga drogas.
Ubos sa liderato ni PCOL Atanacio, gipalig-on sa CPPO ang koordinasyon sa mga barangay, mga pagpatuman sa unit, ug mga nasudnong ahensya aron makab-ot ang gitumong nga intelligence-driven nga mga operasyon batok sa tanang lebel sa drug network.
Padayon ang panawagan sa CPPO sa publiko nga mosuporta sa kampanya pinaagi sa pagreport sa mga kadudahang kalihokan ug sa panaghiusa batok sa ilegal nga drogas.
Kini nga kalampusan dili lang operasyonal nga kadaugan, kundi usa usab ka pagpamatuod sa dedikasyon ug kaisog sa mga kapulisan sa Sugbo sa pagpanalipod sa katawhan ug pagpadayon sa kalinaw.
Source: CCPO
I via Renante Socia Lada