Giklaro nga ipatuman sa Basilica Minore del Santo Niño de Cebu nga dili tugutan ang mga politiko nga mosakay sa galleon atol sa Fluvial Procession sa Enero 17 isip kabahin sa Sinulog festivities.
Matud ni Rev. Fr. Jules Van V. Almerez, OSA, sakop sa Basilica Secretariat ug media liaison friar-in-charge sa fluvial procession, nakahuman na og lista ang Basilika sa mga mosakay sa galleon. Lakip niini ang Arsobispo sa Sugbo ug ang iyang mga piniling dinapit nga bisita.
Gipasabot sa pari nga ang maong desisyon gihimo aron mapadayon ang kahapsay, disiplina, ug relihiyosong kahulugan sa kalihokan. Dugang pa niya, gusto sa Simbahan nga malikayan ang sayop nga pagsabot sa publiko, ilabi na nga adunay nagpadayon nga mga isyu sa korapsyon nga naglibot sa pipila ka politiko.
Bisan pa sa maong polisiya, gitugotan gihapon ang mga politiko nga moapil sa fluvial procession isip mga partner sa suporta, apan dili sila makasakay sa galleon, subay sa mga giya nga gipahimutang sa Basilica alang sa kalihokan.
I via Renante Socia Lada