Gidagsa og liboan ka mga deboto nga nitambong sa penitential Walk with Jesus kaganinang kadlawon, Enero 8, 2026, nga mao ang opening salvo sa ika-461 nga Fiesta Señor sa Dakbayan sa Sugbo.
Sumala sa mga otoridad malinawon ug hapsay ang pagpadagan sa kalihokan bisan pa sa kadaghan sa mga nanambong, tungod sa maayong koordinasyon sa mga ahensya sa gobyerno ug mga volunteer.
Nagsugod ang proseso alas 4:00 sa kadlawon gikan sa Fuente Osmeña, diin ang mga deboto naglakaw padulong sa Basilica Minore del Santo Niño de Cebu samtang nag-ampo ug nagpasalamat. Ang kalihokan nagpamatuod sa dakong pagtuo ug debosyon sa mga Sugboanon.
Pag-abot sa Basilica, gihimo ang pag-install sa Hermano ug Hermana Mayores karong tuiga, nga sila Edgar Mary Sarmiento ug Jennifer Helen Weigel-Sarmiento, nga tradisyonal nga parte sa selebrasyon sa Fiesta Señor.
Gisundan dayon ang proseso sa unang misa sa unang adlaw sa nobenaryo. Matud sa Basilica, ang mga misa gi-iskedyul gikan alas 4:00 sa kadlawon hangtud alas 7:00 sa gabii aron matagaan og higayon ang tanang deboto nga makatambong ug makahatag sa ilang pag-ampo.
I via Renante Socia Lada