Usa ka insidente sa pagpamusil ang nahitabo sa Barangay Basak Pardo, Dakbayan sa Sugbo, sayo sa kaadlawon sa Pebrero 7, 2025, nga misangpot sa pagkamatay sa usa ka lalaki ug pagkaangol sa usa ka babaye.
Ang biktima nga lalaki namatay diha-diha human maigo sa mga bala, mao siChristipher Llaban, hingkod ang panuigon, ug ang naangol mao si Jenny Gemang, pulos sila residenti sa Brgy. Quiot, Siyudad sa Sugbo.
Matod sa inisyal nga imbestigasyon, ang duha naa sulod sa usa ka panimalay dihang kalit lang silang gipusil sa usa ka wala mailhing tawo. Ang babaye misuway og dagan ug misulod sa laing balay, apan gisundan gihapon sa suspetsado ug gipusil.
Sa pagresponde sa kapulisan ug barangay opisyal, nakit-an nila ang babaye nga adunay daghang samad pinusilan. Lima ka empty shell sa bala ang nakuha sa crime scene, ug adunay mga drug paraphernalia nga nasakmit sa sulod sa balay diin nahitabo ang insidente.
Matod sa kapitan sa barangay, ang duha ka biktima ilado nga may koneksyon sa ilegal nga drogas ug kaniadto nang gipahimangnoan nga dili mopadayon sa ilang kalihokan sa maong dapit.
Sa pagkakaron nagpadayon ang imbestigasyon sa kapulisan aron masuta ang motibo sa maing krimin ug responsabli niini.
I via Renante Socia Lada