“Tinud-anay, kamo man gyuy nag-una niadtong mga panahon. Igo nalang mi nidawat sa inyong gipangbuhat sa unang mga panahon, the good that you have done for Cebu City. So, salamat kaayo maam and we are very proud, labi nga taga-Cebu City gyud ka.”
Kini ang mga pulong paghangop ni Atty. Raymond Alvin Garcia kang Lola Caridad Mercado sa ilang panagkita kagahapon sa buntag, Septiyembre 5, 2024, kay tuyo siyang gibisita sa acting mayor sa Dakbayan sa Sugbo sa iyang panimalay sa Brgy. Parian.
Didto si Acting Mayor Garcia sa ilaha n I Lola Caridad aron itunol kaniya ang P100,000 nga pahalipay sa Kagamhanan sa Dakbayan sa iyang paghiabot sa edad nga 100 niadtong niadtong Pebrero 5, 2024.
Ang pagtunol sa tseke nga P100,000 gisaksihan sa mga anak ni Lola Caridad nga mga babaye; ni Atty. Homer Cabaral, labaw sa Office of the Senior Citizens Affairs; ug sa mga taga-Department of Social Welfare and Services; City Treasurer’s Office; ug sa mga opisyal sa Parian pinangulohan ni Kapitana Lucy Lazarte.
Daw sama sa ginikanan ang gihimong pagtagad ni Acting Mayor Garcia kang Lola Caridad, nga nangomedya pa sa iyang edad sa dihang gipangutana niini.
“So, pila imong edad gyud?” pangutana sa acting mayor.
“Fifty!” tubag ni Lola Caridad dalang bahakhak.
“How I wish I can be like you. I’m so happy to see you…. Hibawo ka maam inspiration gyud ka—inspiration to many Cebuanos,” sulti sab ni Acting Mayor Garcia.
Sumala sa usa sa pito niya ka mga anak (lima ang babaye ug duha ang lalaki), kinaham ni lola Caridad ang adobo, humba, ug manok, ug masuko kining hatagan og utan kay susama daw siya nga adunay sakit.
Maayo pa sab kaayoa ng iyang panghunahuna ug pandungog ug makabasa pa siya ug kaya pa kaayo ang pagpirma.
Timaan sa iyang pagkabibo, niingon si Lola Caridad dihang padung na nanamilit ang iyang mga bisita nga kung nakahibawo pa lang siyang daan nga adtuon sa mga taga-City Hall, ilabi na ni Acting Mayor Garcia, magpahikay o magkumbira unta siya.
Laing nagpangidaron na og 100 nga lumolupyo sa dakbayan nga giadto ni Acting Mayor Garcia mao si Urzulina “Lola Zuling” Puno sa Brgy. Poblacion Pardo, nga nagsaulog sa iyang ika-100 nga adlawng natawhan niadtong Hunyo 1, 2024.
Si Lola Zuling, nga inahan sa ambassador sa Pilipinas ngadto sa nasud nga Qatar nga si Lilibeth Puno, gitunulan usab sa acting mayor og tseke nga P100,000. (Renante Socia Lada)
(Source: Cebu City PIO)