Gihangop sa mga mananagat sa dakbayan sa Mandaue ang gipanghatag nga mga bangka gikan sa Yellow Boat of Hope Foundation niadtong nakalabay nga adlaw.
Gumikan kini sa pakig alayon sa kagamhanan sa siyudad sa Mandaue sa maong Foundation aron mahatagan og mga bangka ang Fisherfolks Association of Mandaue.
Nikabat og 16 ka mga bangka ang gipang apod-apod sa mga mananagat sa Barangay Basak, Jagobiao, Labogon, Looc, Opao, Paknaan, Subangdaku ug umapad.
Ang Yellow Boat of Hope Foundation usa ka non-government organization nga nagpakabana sa kabataan nga nanimuyo daplin sa kadagatan.
Niabag usab sa maong proyekto ang Angel Protocol ug International School diin sila ang nagpintal sa maong mga bangka.
Sa wala pa nidawat ang mga beneficiaries gipaubos una sila sa usa ka seminar sa Anti-Terrorism Awareness ug NTF ELCAC aron mabatukan ang terorismo labi na sa padayon nga pagpang recruit.
Gidasig usab sila nga sundon ang insakto nga paglabay sa mga basura isip pag atiman sa kalikupan.
Ang maong kalihukan gitambungan sa mga opisyalis sa dakbayan sa Mandaue. (Renante Lada, photo courtesy of Mandaue City PIO)