Nagpahigayon ang Cebu Provincial Government og lima ka adlaw nga training sugod niadtong Pebrero 16, 2026 aron ma-andam ang pag-update sa 10 ka tuig nga Provincial Development and Physical Framework Plan (PDPFP).
Ang seminar-workshop nga gitawag og “Enhanced Climate and Disaster Risk Assessment” (ECDRA) mao ang una sa upat ka sunod-sunod nga training. Gipangulohan kini sa Provincial Planning and Development Office (PPDO), nga maoy magtigom sa tanang datos nga makuha sa mga partisipante.
Gilauman nga makabuhat ang PPDO og unang draft sa bag-ong PDPFP pagsugod sa Oktubre karong tuiga. Ang PDPFP usa ka 10 ka tuig nga plano nga maggiya sa kalamboan sa probinsya—lakip ang ekonomiya, palibot, yuta, ug imprastruktura.
Ang mga mitambong sa training gikan sa nagkalain-laing opisina sa probinsya sama sa disaster risk reduction, environment and natural resources, agrikultura, turismo, ug engineering. Ang mga moderator gikan sa Department of Human Settlements and Urban Development (DHSUD), nga nagpasabot nga ang PDPFP usa ka komprehensibo ug long-term nga plano alang sa malungtarong kalamboan.
Sa maong training, gitun-an sa mga partisipante ang pagkuha ug pag-organisar sa datos bahin sa climate change ug mga peligro sama sa baha ug landslide, paghimo og risk maps, ug pag-analisar sa posibleng epekto niini sa komunidad. Kini kabahin sa paningkamot sa Kapitolyo nga masiguro nga andam ang Sugbo sa mga hulga sa klima samtang nagpadayon ang kalamboan sa probinsya.
Source: Cebu Province PIO
I via Renante Socia Lada