Nagpakusog ang mga eskwelahan sa Cebu City sa paglimpyo ug pag-recycle sa basura pinaagi sa programang “Basura Namo, Kaugmaon Nato,” kauban ang Cebu City Government.
Ang programa nagtudlo sa mga estudyante ug magtutudlo sa sakto nga pagbulag sa basura, pagkolekta sa mga mahimong ma-recycle sama sa plastic bottles, ug dili pagpataka og labay sa basura.
Lakip sa mga eskwelahan nga miapil ang Camp Lapulapu Elementary School, City Central School ug Pasil Elementary School. Sa Camp Lapulapu, nakolekta ang 161.95 kilos nga plastic bottles, samtang sa City Central School, kapin 601.5 kilos ang nakolekta nga adunay bili nga ₱1,503.75.
Sa Pasil Elementary School, miapil ang mga estudyante gikan Kindergarten hangtod Grade 6, lakip ang mga high school students. Kapin 600 kilos nga mga recyclable nga basura ang ilang unang nakolekta.
Matud sa City Government, ang programa makatabang sa mga bata nga maanad sa husto nga pagdumala sa basura. Gilauman usab nga ilang madala kini nga maayong batasan sa ilang mga panimalay ug komunidad.
📸 Cebu City PIO
I via Renante Socia Lada