Gipagawas sa Cebu City Hall ang ilang mga empleyado human mabati ang kusog nga linog sa lain-laing bahin sa Visayas kagahapon, Mayo 4, 2026.
Sumala sa inisyal nga report sa Philippine Institute of Volcanology and Seismology, ang linog nahitabo bandang alas 2:09 sa hapon ug adunay magnitude nga 6.1, nga naggikan sa Eastern Samar ug nabati usab sa Cebu City ug ubang lugar.
Human sa paglinog, dayon nga gipatuman sa mga empleyado sa City Hall ang hapsay nga evacuation ug miadto sa mga open area nga giandam isip kabahin sa earthquake safety procedures.
Wala’y natalang nasamdan o dakong kadaot sulod sa City Hall base sa pinakabag-ong impormasyon. Padayon gihapon ang pagmonitor sa mga otoridad samtang naghulat sa dugang opisyal nga advisory.
Nagpabilin usab nga alerto ang Cebu City Disaster Risk Reduction and Management Office batok sa posibleng aftershocks ug nagpadayon sa koordinasyon sa ubang ahensya aron masiguro ang kaluwasan sa publiko.
Giawhag sa mga opisyal sa siyudad ang tanang empleyado ug residente nga magpabiling kalmado, magbantay, ug mosunod sa saktong earthquake safety protocols ilabi na kung adunay mosunod nga aftershock.
Source: Cebu City PIO
I via Renante Socia Lada