Gisakmit sa City Meat Inspection Service (CMIS) ubos sa Department of Veterinary Medicine and Fisheries (DVMF) ang 12.7 ka kilo nga lechon nga giilang “hot meat” sa usa ka operasyon sa Buenas Drive, Barangay Lahug niadtong Mayo 3, 2026, alas 9:05 sa buntag.
Base sa imbestigasyon sa inspection team, ang karne sa maong lechon gikan sa Barangay Guba ug giihaw lamang sa likod sa balay sa igsoon sa nagbaligya. Giluto kini aron ibaligya sa Lahug bisan walay Meat Inspection Certificate, nga supak sa balaod.
Gipasidaan sa DVMF nga delikado sa panglawas ang pagkaon sa “hot meat” o karne nga wala maagi sa sakto nga inspeksyon ug dili gikan sa accredited slaughterhouse.
Giklaro usab nga ang backyard slaughtering ug pagbaligya og walay permit usa ka paglapas sa City Ordinance 2189 ug sa Republic Act No. 9296.
Giawhag sa mga otoridad ang publiko nga mopalit lamang og karne ug lechon gikan sa mga lisensyado ug giinspeksyong tindahan aron malikayan ang peligro sa ilang panglawas.
Source: DVMF
I via Renante Socia Lada